Poeżija Franġiskana
Lir-Raħeb ta' Assisi
George Grech
Lir-Raħeb ta' Assisi
Bħal Kristu ċħadt id-dinja,
stmerrejt il-frugħa, l-għana;
twaħħadt mal-fqir, l-imġarrab,
warrabt lil dawk setgħana.
Bħal Kristu ħabbejt 'l Alla
ridt tagħmel ir-rieda tiegħu;
dlonk tlaqt it-tbaħrid kollu,
twaħħadt għalkollox miegħu.
Bħal Kristu ridt li ssofri,
fuq kliemu inti mxejt.
Bħalu kaxkart lil ħafna,
bl-eżempju li wrejt.
Bħal Kristu ġbart madwarek
xirka ta' nies ġwejdin,
u fis inti sawwarthom
f'xirka ta' qaddisin.
Bħal Kristu tajt imħabbtek
lill-Knisja mwaqqfa minnu.
Lilu għannejt bl-imħabba
u sawwart l-akbar innu.
Bħal Kristu ħabbejt il-paċi,
il-maħfra u l-imħabba,
il-fidi, id-dawl, it-tama,
is-safa, xejn imtebba'
Din il-Poeżija dehret fid-Dawl Franġiskan, Leħen il-Kapuċċini Maltin, Għadd 367, Frar 2017, paġna 8.
Burmarrad - 28.2.2017
poeżija
ta'
George
Grech