Nitolbu ma' San Franġisk
Novena bi tħejjija
għall-Festa ta’ San Franġisk
Il-Ħames Jum
29 ta' Settembru
Kif rajna l-bieraħ, Franġisku sema’ lil Ġesù jkellmu mill-kurċifiss. Bla telf ta’ żmien Franġisku beda jara min fejn u kif ser jibda. Beda mill-knisja ta’ San Damian, li kienet knisja ċkejkna għoddha qed taqa’ u li kellha bżonn tiswija waħda sew. Beda bi ftit ġebel u ftit tajn. Nistgħu nifhmu li Franġisku bin is-sinjuri ma kienx tal-qata’ għal dak ix-xogħol, madanakollu Franġisku ma qatgħax qalbu.
Issa kien jittallab ftit ġebel u issa ftit tajn u hekk ġebla wara l-oħra l-knisja rnexxilu jsewwiha. Wara ftit taż-żmien ġew xi żgħażagħ jagħtuh daqqa t’id u hekk beda bil-ftit il-ftit jinbena l-Ordni Franġiskan.
L-Ordni ta’ San Franġisk beda bi ftit żgħażagħ li semgħu l-kelma u l-istedina ta’ Kristu fil-Vanġelu u meddew għonqhom għax-xogħol, li fil-bidu kien dak tal-bini fil-ġebel. Tal-għaġeb hux tassew!?
Ġesù għadu jkellem b’mod sempliċi u ċar lilna wkoll. Irridu nimitaw lil Franġisku. Jista’ jagħti l-kaz li nifhmux mill-ewwel x’ikun qiegħed igħidilna, u għall-bidu saħansitra nistgħu nagħmlu xi passi foloz. Imma jekk nisimgħu sewwa u nippruvaw nagħmlu dak li naħsbu li qed jitlob minna, ħaġa ta’ l-għaġeb, naraw l-affarijiet iseħħu tassew. Alla jissokta jiċċara dak li jrid minna hekk kif minn naħa tagħna nkomplu. Jeħtieġ li nibdew u Alla jieħu ħsieb il-bqija. Tassew ta’ l-għaġeb!
Talba
Għażiż San Franġisk
għinni biex jisma’
għinni biex nibda miexi
fid-direzzjoni li Alla qed jurini.
Għinni biex nibqa miexi!
Alla mhux qed isejjaħli
biex nwettaq ħwejjeġ kbar
iżda biex niġbor ftit ġebliet,
iva, ftit ġebel żgħir
biex jien ukoll insewwi
l-knisja tal-Mulej hawnhekk
fejn ninsab illum.
Ammen.
Testi meħudin u maqlubin għall-Malti minn e-mail li waslet bl-isem "Novena in Honour of St Francis of Assisi" li wasal lil dan is-site mill-Indja.
Valletta - 4.10.2004
Novena
Il-Hames
Jum
Il-Festa
ta'
San Franġisk
ta' Assisi tiġi ċċelebrata
kull sena
fl-4 ta' Ottubru.