Kurunelli ta' San Franġisk
Kurunelli ta' San Franġisk
■ 1. Kurunella ta' San Franġisk
■ 2. Kurunella f'ġieħ il-Pjagi ta' San Franġisk
1. Kurunella ta' San Franġisk
O Franġisku Patrijarka
Minn t'Assisi l-akbar ġmiel,
Bosta qima l-Knisja kollha
Lilek tagħti bħal missier.
Għalhekk aħna lkoll madwarek
Ġejna l-lum biex inqimuk,
Sabiex turi dejjem 'l Alla,
L'inti tħobbna u nħobbuk.
Glorja.
Kif ġo stalla fit-tbatija
Għalkemm għani, int twelidt,
Ma domtx wisq biex minn did-dinja
Għala dejjem qalbek fridt.
Bit-talb tiegħek fittex ħollna
Int mid-dinja li ssaħħarna,
La tħallix li bil-qerq tagħha
Jirnexxilha li tjassarna.
Glorja
Il-wirt kollu ta' missierek
Bl-akbar ċaħda rrifjutajt,
U sal-libsa wkoll minn fuqek
Biex tajthielu dlonk inżajt.
Aħna lilek xejn ma nixbħu,
B'ġid id-dinja mogħmijin;
Int għallimna kif fid-dinja
Kollox frugħa, xejn m'hu bnin.
Glorja.
Lil Missierek, Alla waħdu,
Ħabbejt dejjem sa kemm għext;
Teżor kbir ħejjejt għall-ġenna
Billi lilu qatt ma r'għext.
Agħmel inti li b'Missierna
'l Alla bħalek aħna nfittxu,
Biex jagħnina bil-wirt tiegħu,
U jurina l-ġmiel ta' wiċċu.
Glorja.
Għadu dejjem tal-foħrija,
Kont titgħaxxaq bit-tmaqdir,
Xewqa tiegħek din biss kienet:
Li tixxandar midneb kbir.
Il-maqlub li kont int tagħmel
Aktarx jidher f’bosta minna:
Nidhru rridu fuq ħaddieħor,
Ma naħmlux min iċekkinna.
Glorja.
Li tinħaqar u titbiċċer
B'penitenzi qatt ma nsejt;
Ġawhra safja l-ġisem tiegħek
Mit-twelid sal-mewt għożżejt.
Kif qed tara, aħna dgħajfa
U r-ruħ tagħna tebbajnieha,
Nitolbuk għalhekk tgħallimna
Ma nħallux id-dnub jifniha.
Glorja.
Għalkemm kbar ġarrabt irwiefen,
Wasalt fl-aħħar fis-Surija:
Hemm tal-paċi tajt il-bxara,
Ħdimt għall-Fidi Nisranija.
Kif kull ħażen int xejjintu
Bin-nirien minn tal-qalb tiegħek;
Issa narek fina kebbes
Biex għal Alla naħdmu miegħek.
Glorja.
Bħal Ġesù mislub għalina
Niżel darbek Serafin;
Juri dan kemm Alla ħabbek
Fost l-eluf tal-Qaddisin.
Int fil-pjagi fis fakkarna
Ta' Ġesù, li b'demmu fdiena,
Biex b'imħabbtu dlonk ninxtegħlu,
U nedmin insibu ħniena.
Glorja.
2. Kurunella f'ġieħ il-Pjagi ta' San Franġisk
(17 ta' Settembru)
Hawn quddiemek, O Mulejja,
Għarkobbtejna mixħutin,
Nadurawk mill-qiegħ ta' qalbna,
W talb noffrulek fl-istess ħin.
Ilqa' l-ġerħa minn tar-riġel
Ta' Franġisku, qaddej tiegħek,
Li t-tbatija tal-passjoni
B'din il-ġerħa qasam miegħek.
Bit-tifkira ta' weġgħatek,
Nitolbuk, Mulej, tagħtina
Li nitbiegħdu minn ħżunitna,
Ma nibqgħux fit-triq ħażina.
Glorja.
Hawn quddiemek, O Mulejja...
Hekk ukoll, Mulej noffrulek
Ġerħat siequ l-leminija,
Illi sofra bl-akbar sabar
Bla tgemgim u bla kburija.
Nitolbuk, Mulej tal-ħniena,
Tul it-triq ibqa' mexxina,
sakemm lilna f'darek twassal,
Fejn bi ġmielek int thennina.
Glorja.
Hawn quddiemek, O Mulejja...
O Mulej, aħna noffrulek
Ġerħa ħarxa tnixxi d-dmija,
Li Franġisk batieha miegħek -
Ġerħet idu x-xellugija.
Nitoblok, agħtina l-grazzja
Li fit-tieni miġja tiegħek
Fuq lemintek aħna nkunu
Biex il-ġenna nidħlu miegħek.
Glorja.
Hawn quddiemek, O Mulejja...
Minn qiegħ qalbna wkoll noffrulek
Ġerħet idu leminija,
Li int lilu għoġbok tagħti,
Biex issieħbu fit-tbatija.
Agħmel int, o Alla tagħna,
Li x-xitan qatt ma jirbaħna,
U fil-glorja minn tal-ġenna,
Naraw wiċċek, u sserraħna.
Glorja.
Hawn quddiemek, O Mulejja...
Fl-aħħarnett, Mulej, noffrulek
Ta' Franġisk ġerħet il-qalb,
Li hu rċieva fuq l-Alvernja,
Meta kien mgħargħar fit-talb.
Nitolbuk, Mulej, li qalbna
B'wiċċek biss tkompli tithenna
U mbagħad niġu nbierku lilek
f'sebħ bla tmiem, f'saltnet il-ġenna.
Glorja.
Statwa
ta'
San Franġisk
ta' Assisi
Meqjuma
fil-Knisja ta'
San Franġisk
Valletta - Malta
