Nitolbu ma' San Franġisk
Sekwenza
għall-Quddiesa tal-Festa ta’ San Franġisk.
4 ta’ Ottubru
Għeliem ġodda ta' qdusija
Nisslu xempju ta' tjubija
Li troxx ġid u tferrex dija
Mit-tagħlim ta' San Franġisk.
F'għaqda ġdida lill-imxierka
Ingħataw liġijiet xierqa
Dmirijiet ġodda u mbierka
Imfasslin minn San Franġisk.
Ordni ġdid u ħajja xegħlu
B'liġi mqaddsa tneħħa l-velu
Li kien satar il-Vanġelu
Dwal li d-dinja reġgħet rat.
Liġijiet minn Kristu mnebbħa
Għad-deh'n tagħhom m'għerfu mxebbha
Fuq l-oħrajn dlonk kisbu rebħa.
F'isem l-ogħla apostolat.
B'ħabel aħrax, b'ċoqqa fqira
Għatta surtu bi tmaqdira;
Ħobż bil-qies, ikel ħarira;
Siequ ċaħħad miż-żarbun.
Ħajtu jsaffi ried mill-faqar
Minn kull ħajr għażel jinħaqar,
Għat-tlellix tilef is-sabar,
Warrab ġidu għall-kurdun.
Qalbu fittxet dawk l-imkejjen
Fejn bi dmugħ għajnejh iżejjen
B'sobgħa għaż-żmien siewi li xejjen
Mat-tgerbib ta' seklu sħiħ.
Mill-blat, fl-għari, Fejn mar joqgħod
Għajnejh sammar fl-għoli, 'l bogħod;
Frugħa d-dinja tgħallem jobgħod
B'lehma mfittxa mis-smewwiet.
Ġismu mgħakkes sar bla sura
Lewn il-ġilda ksietu s-sfura;
L-ikel fittex fl-Iskrittura;
Stmerr il-ħajra tax-xewqat.
Fuq muntanja f'għar intafa',
Mill-art wiċċu qatt ma rafa'
Sa ma ġewh is-sliem u safa;
U f'dal ħabs ta' xewqtu strieħ.
F'daqqa waħda feġġ bħal beraq,
Sid id-dinja s-sema feraq,
Moħħ ir-raħeb l-għaġeb seraq,
W hekk intrafa' f'dan in-nebħ.
Ġablu l-marki tat-tbatija
Li Ġesu ġarrab bla ħtija
U fuq laħmu stampa d-dmija,
Naqqax ġrieħi bl-istess xebħ.
Huwa ħaseb, b'dieqa f'qalbu,
Fil-ħruxija ta' min sallbu,
Ġenbu, idejh u saqajh ġarrbu
Dak li ġarrab il-Mulej.
Twaħħdu r-rwieh b'għaġeb tas-sema
Il-Qaddis tkellem u sema';
Wara ra l-ġrajja f'miġemgħa
Li se jiġru għal li ġej.
Hawn xi msiemer f'għadmu ssammru
Suwed barra, f'ġismu tħammru
Truf il-ġrieħi ħass jixxammru
Mat-titġib tal-ponot twal.
Ma sarux bl-għodod ġriħietu;
Kienu grazzja skond xewqietu
Il-martell tħalla fi skietu,
Feġġu f'ġismu bħall-inwar.
(*) Fuq il-ġisem, għadu tagħna,
Int irbaħt ġlidiet ħerqana
Sbaqt il-ġibda hekk setgħana
Bis-sinjali tas-salib.
Agħmel raħeb li jħarsuna,
F'kull taqbida li jsaħħuna
U jħejjulna dik l-għajnuna
Li tmexxina fit-taqlib.
O Missier, ħniena u qdusija,
Għolli n-nies li ħriġt mill-ħtija
Ma' l-irħieb f'għaqda aħħarija
Lejn is-saltna tas-smewwiet.
Ħa jissieħbu mal-maħtura
Dawk l'għallimt u tajthom sura,
Ma' l-irħieb iż-żgħar miġbura
Jgħixu l-ħajja tal-ħajjiet.
Amen. Hallelujah.
It-test huwa meħud mill-Missal, Ruman Serafiku, Vol I, Malta 1979
Din
is-Sekwenza
waqt
il-Quddiesa tista':
jew tinqara kollha kemm hi,
jew jinġraw biss l-aħħar strofi
mill-(*) Fuq il-ġisem għadu tagħna,
jew inkella tista’ titħalla barra,
z